اوعى تفكر
اوعى تفكر
انك غايب عنى ف بعدك
وانى بعيد
اوعى تشيل الاهه ف قلبك
والتنهيد
عمرى ما دقت يا غالى
ف بعدك ...
طعم الغيبه
وكلمه هجر دى بالنسبالى ...
كلمه غريبه
اشكى البعد ازاى وعيونك
منى قريبه
مع ان اللى ما بينا
جبال وبلاد
عمر قلوبنا يا غالى
ما داقت طعم بعاد
احلم ... تحلم
اسهر ... تسهر
تكتب شوقك شعر ومغنى
اكتب اكتر
تنده وسط الزحمه حنينى
اجى اتمخطر
تأمر طيفى يجيلك يجرى
قبل ما تأمر
واما اشتاقلك ..........
اطلع فوق الناس بعيونى
وانطق اسمك
القى الدنيا لبست توبك
فاحت عطرك
حتى الزرع الاخضر سحره
يشبه سحرك
ونور الصبح كأنه بيضوى
علشان خاطرك
وامشى ف اى طريق القانى
ماشى ليمك
ما انا قولتلك ........
عمرى ما دقت يا غالى
ف بعدك ...
طعم الغيبه
وكلمه هجر دى بالنسبالى ...
كلمه غريبه
اشكى البعد ازاى وعيونك
منى قريبه
..............................
عمده
ليست هناك تعليقات:
إرسال تعليق