قصيدة نسجتك .. للشاعرة ايزيس غانم

نسجتك بين خيوط دمى..

حفرتك جوه شرايينى..

نقشتك فوق جدار قلبى..

بنقرة...سن سكينى ...

وطرت معاك ..ف بطن سماك..
على جناحك ..ورمشينى..
حبيبى قولّى مين قبلك..
ومين يقدر ف يوم بعدك..
يكون فارس على حصونى..؟
حصونى شمس مصريه..
جبالها تلج فوق ميّه...
ف مين يقدح قلبى..
يجرّى العشق ف عروقى..؟
ولو حاصر دماها التلج..
نيران حبك تدفينى...
سلام هيّ على عروشى..
تنقى البرد من دمى ..وتحيينى..!!
فمين غيرك على فرسى يكون فارس؟
ومين غيرك لو نزف جرحى ..
بجرحه الباكى يشفينى ..؟
ويحضن فيّا أوجاعى ..
يجففلى دموع عينى....؟
أنا مصريتى عشقى..
زليخه .ساكنه ف سنينى ..!!!!!
لكنى بعيد زمن نفسى..
واشوفك يوسف المعشوق..
وانا العاشقه ف محرابك ..
وعشقك..مالى موازينى ..
انا مصريه يا مصرى ..
فكون مصرى .......
وكونلى تاريخ يصحينى ..
وحسسنى ...بإن حضارة الدنيا ..
نقوش حيّه على جبينى ..
وإن حضارتك الحاضرة حضارة قلب..
بعيدة عن ظلام جدى..
وتحكيمه الفراعونى...........
فخلى نسيجك العاشق يكون فيضان..
يخضّر نيله بساتينى...
يخضّر....نيله بساتينى ..!!

.....................................
حصونى شمس مصريه..
إيزيس غانم..