مابين اللحظة والتانية
مابين اللحظة والتانية حنين جاير
لنبضة حب مروية بشوق حاير
اعيش وياها احساسي نفس داير
بتاخده اللهفة جواها ليوم معلوم
لو إتحرك باضم حنيني جوايا
واعيش سهده
ولو ينده بالَحن صوتي غنواية
واكون نبضه
واعيش استني لميعاده واصون وده
ده عمري بكل تفاصيله عليه مفطوم
آهاتي تترسم جوايا احلي عذاب
وباسمع صوته لو يصرخ بكل عتاب
واضمه لقلب دنيايا ده اعز احباب
ياصبره اللي ابتلاه ربه وكان محروم
ده اجمل فلذة من قلبي يامحيا ضياه
لعمره راح اكون سنده وصوتي صداه
ولو عصفت رياح قدره هاعيش لحماه
واكون له مرايته لو ينسي ويظلم يوم
راح ابذر بالامل جواه سنين احلام
حصادها ع المدي تبقي رماح و سهام
واكون ضحكايته لو مرة تجور الايام
ودمعي يطهر اخطاءه وعنه تصوم
يازرعة خلقها جوايا اله الكون
وسندي لو تعدي ايامي تبقي سكون
ولو سألوني اقول ابني وحبه جنون
ابيع الدنيا لو وقفت قصاده يوم
ميرفت حموده
ليست هناك تعليقات:
إرسال تعليق